(ပြည်တွင်း)မေ ၃၁
နေပြည်တော်၊ ပုဗ္ဗသီရိမြို့နယ်၊ ရွာသစ်ကျေးရွာအနီး၊ သပြေလမ်းနှင့် ရွာသစ်ကျေးရွာ အဝင်လမ်းထောင့်တွင် ယမန်နေ့ည ၉ နာရီအချိန်ခန့်က ဆိုင်ကယ်ကယ်ရီသမား တစ်ဦး၏ လည်ပင်းကို ဓားဖြင့် လှီးကာ ဆိုင်ကယ်လုယူမှု ဖြစ်ပွားခဲ့ကြောင်း သိရသည်။
ဖြစ်စဥ်မှာ မေလ ၃၀ ရက်နေ့ ည ၈ နာရီခွဲ အချိန်ခန့်တွင် ဦးဇေယျာလင်း၊ အသက် ၄၇ နှစ်၊ (ဘ)ဦးရွှေကို၊ ကယ်ရီမောင်း၊ နယ်မြေ(၆)၊ ရန်အောင်(၂)ရပ်ကွက်၊ ပျဉ်းမနားမြို့နေသူနှင့် ဇနီးဖြစ်သူ ဒေါ်နှင်းနှင်းခိုင်တို့သည် ပျဉ်းမနားမြို့ မြင်းရုပ်အနီး ရန်နိုင်စားသောက်ဆိုင်ရှေ့တွင် ခင်ပွန်းဖြစ်သူနှင့် အတူထိုင်နေစဉ် အသက်(၂၅-၃၀)နှစ်ကြားခန့် လူငယ် ၁ ဦးရောက်ရှိလာပြီး (၆)ထပ်ကြီး၊ ယာဉ်မှုစစ်ရုံးဘက်သို့သွားပြီး ပါဠိကွေ့သို့ပြန်လာမည်ဖြစ်ကြောင်းပြောဆိုကာ ဆိုင်ကယ်ငှားရမ်းလာသဖြင့် ကယ်ရီခ ငွေ(၇၀၀ဝိ/-)ကျပ်ဖြင့် NPW- 8W/33491 KENBO 125 အမျိုးအစား အနက်ရောင်ဆိုင်ကယ်ဖြင့် ကယ်ရီလိုက်သွားခဲ့ကြောင်း သိရသည်။
၎င်းနောက် ဒေါ်နှင်းနှင်းခိုင်သည် နေအိမ်သို့ပြန်လာပြီး ည ၉ နာရီ အချိန်ခန့်တွင် ခင်ပွန်းဖြစ်သူ၏ ဖုန်းဖြင့် အမျိုးသမီး ၁ ဦးမှ ခင်ပွန်းဖြစ်သူ ဦးဇေယျာလင်း ပုဗ္ဗသီရိမြို့နယ် ရွာသစ်ကျေးရွာအနီး သပြေလမ်းနှင့် ရွာသစ်ကျေးရွာအဝင်လမ်းထောင့်တွင် ဒဏ်ရာရရှိကာလဲကျနေသည်ဟု ဖုန်းဆက်အကြောင်းကြားလာသဖြင့် ၎င်းနေရာသို့ သွားရောက်ခဲ့ရာ ခင်ပွန်းဖြစ်သူသည် လည်ပင်းတွင် ပြတ်ရှဒဏ်ရာ ၁ ချက်ရရှိကာ လမ်းဘေးတွင်ထိုင်နေသည်ကို တွေ့ရှိရပြီး ဆိုင်ကယ်ကိုလည်း မတွေ့ရှိတော့ကြောင်း သိရသည်။
ဒဏ်ရာရရှိသူ ဆိုင်ကယ်ကယ်ရီသမား ဦးဇေယျာလင်းအား နေပြည်တော် ကုတင် (၁၀၀၀)ပြည်သူ့ဆေးရုံသို့ ပို့ဆောင် ဆေးကုသလျက်ရှိပြီး လည်ပင်း ဒဏ်ရာရရှိအောင် ဓါးဖြင့်ထိုးပြီး ဆိုင်ကယ် အား လုယူသွားသူ အမည်မသိ(အမျိုးသား) ၁ ဦးအား ဖမ်းဆီးရမိနိုင်ရေး သက်ဆိုင်ရာနယ်မြေရဲစခန်းမှ ဆောင်ရွက်လျက်ရှိကြောင်း သိရသည်။
VK Link»…
https://vk.com/wall-220066330_6519
Telegram>>…
https://t.me/positiveanglenews