(မှုခင်း) နိုဝင်ဘာ ၇

မွန်ပြည်နယ်၊ မော်လမြိုင်မြို့နယ်၊ ရိုးဂိုးကျေးရွာလမ်းဝရှိ “မင်းသန့်” စက်သုံးဆီဆိုင်အတွင်း မီးလောင်မှုဖြစ်ပွားနေစဥ် ပေါက်ကွဲမှုဖြစ်ပွားခဲ့သည့်အတွက် မီးသတ်သားတစ်ချို့ ထိခိုက်ဒဏ်ရာရရှိခဲ့ခြင်းကြောင့် မော်လမြိုင်ပြည်သူ့ဆေးရုံသို့ ပို့ဆောင်ပေးထားရကြောင်း သိရသည်။

မော်လမြိုင်-မုဒုံသွားလမ်းမကြီး၊ ရိုးဂိုးကျေးရွာလမ်း၀ရှိ “မင်းသန့်”စက်သုံးဆီဆိုင်တွင် ယနေ့ နိုဝင်ဘာ ၇ ရက် ညနေ ၅ နာရီအချိန်၌ မီးလောင်မှုဖြစ်ပွားခဲ့ပြီး ယင်းမီးလောင်မှု မှာ Level -2 အဆင့် အထိရောက်ရှိခဲ့ကြောင်း သိရသည်။

အဆိုပါ မီးလောင်ကျွမ်းမှုမှာ စက်သုံးဆိုင်သို့လာရောက်သည့် ဆီဘောက်ဆာယာဉ်မှတဆင့် မီးလောင်ကျွမ်းခဲ့ခြင်းဖြစ်ပြီး နှစ်နာရီ နီးပါး မီးငြိမ်းသတ်ခဲ့ရကြောင်း သိရသည်။

မီးလောင်ပြင်သို့ ပြည်နယ်အတွင်းရှိ မီးသတ်စခန်းများမှ မီးငြှိမ်းသတ်ယာဉ် ၆ စီး၊ မီးသတ်ရေသယ်ယာဉ် ၈ စီး၊ Foam မီးငြှိမ်းသတ်ယာဉ် ၄ စီး တို့ဖြင့် ထွက်ခွာငြှိမ်းသတ် ခဲ့ရကြောင်း မီးသတ်ဦးစီးဌာနထံမှ သိရသည်