(ပြည်တွင်း) စက်တင်ဘာ ၁၂
မိုးအဆက်မပြတ်ရွာသွန်းမှု့ကြောင့် မန္တလေးတိုင်းဒေသကြီး၊ ဝမ်းတွင်းမြို့နယ်၏ အရှေ့တောင်ဘက်အရပ်တွင်တည်ရှိသော စမုံဆည်သည် ယမန်နေ့ည ၇ နာရီအချိန်ခန့်က ကျိုးပေါက်သွားခဲ့ကြောင်း သိရှိရသည်။
၎င်း ဆည်ကျိုးပေါက်ရာမှ စီးဆင်းလာသော ဆည်ရေများနှင့် ကင်းတားဆည်မှ စီးဆင်းလာသောဆည်ရေများသည် ဝမ်းတွင်းမြို့နယ်၏အရှေ့ခြမ်း စမုံချောင်းဘေးနှင့် ကင်းတားလက်ဝဲဆည်ဘေးရှိ ကျေးရွာများဖြစ်ကြသော ရိုးဇုံရွာ၊ မကျီးအုပ်ရွာ၊ ကံစွယ်ရွာ၊ ညောင်ပင်ရွာ၊ ခြင်္သေ့လက်ရွာ၊ ရွာသစ်ရွာ၊ ကိုင်းရွာ၊ ဆားတောင်ကုန်းရွာ၊ ဒီးဒုတ်ရွာ၊ မိုးကောင်းရွာတို့တွင် ရေကြီးနစ်မြုပ်မှုများဖြစ်ပေါ်နေ၍ ရေလွတ်ရာသို့ အရေးပေါ် ရွှေ့ပြောင်းခဲ့ကြရကြောင်း သိရှိရသည်။
အဆိုပါ ရေနစ်မြုပ်မှုအခြေအနေမှာ အနိမ့်ဆုံး ၃ ပေခန့်မှ အမြင့်ဆုံး ၁၂ ပေခန့်ထိရှိပြီး ယနေ့ နံနက်ပိုင်းတွင် ရွာသစ်ရွာ၌ ပိတ်မိနေသောလူ ၃၀၀ ကျော်ခန့်ကို ရေကြီးနစ်မြုပ်မှုမှကယ်ထုတ်ရန်အတွက် မြို့နယ်စီမံအဖွဲ့ထံ ဆက်သွယ်သတင်းပို့ခဲ့ပြီး မြို့နယ်စီမံအဖွဲ့မှ စက်လှေနှင့် ကယ်ဆယ်ရေးလုပ်ငန်းများ ပြုလုပ်လျက်ရှိကာ မြို့နယ်ပြည်ခိုင်ဖြိုးပါတီမှ ပါတီဝင်များကလည်း ထမင်းထုပ်များ ဝေငှပေးနိုင်ရေး တာဝန်ရှိသူများနှင့် ပူးပေါင်းဆောင်ရွက်လျှက်ရှိကြောင်း သိရှိရသည်။
ရွှေကျွန်းသူ
Telegram»…
https://t.me/positiveanglenews