(ပြည်တွင်း)ဩဂုတ် ၁၃
ရန်ကုန်တိုင်းဒေသကြီး၊ သန်လျင်မြို့နယ်၊ သူဌေးကွင်း ကျေးရွာတွင် ဩဂုတ်လ ၆ ရက်နေ့ည ၆ နာရီ ၃၀ မိနစ်အချိန်ခန့်က ဒေါ်သန်းသန်းဆင့်(ခ)မအကြီးမ၊ အသက် ၄၉ နှစ်သည်နေအိမ်၌ ဒဏ်ရာများဖြင့် သေဆုံးနေကြောင်း သိရှိ၇သည်။
ဒေါ်သန်းသန်းဆင့်(ခ)မအကြီးမသည် မိသားစုဝင်များ အလုပ်ကိုယ်စီသွားနေစဉ် နေအိမ်၌ တစ်ဦးတည်းကျန်ရှိခဲ့ပြီး မောင်ဖြစ်သူ ကိုမင်းအောင်ကျော် အလုပ်မှ နေအိမ်သို့ ည ၆ နာရီခွဲခန့်အချိန် ပြန်လည်ရောက်ရှိစဉ်တွင် အစ်မဖြစ်သူမှာ နေအိမ် အိပ်ခန်းအတွင်း ကုတင်ဘေးတွင် ဒဏ်ရာများဖြင့် သေဆုံးနေသည်ကိုတွေ့ရှိကြောင်း သိရသည်။
၎င်းအပြင် နေအိမ်ဘီရို နှစ်လုံးအတွင်းမှ ရွှေထည်ပစ္စည်းမျိုးစုံ ၁၀ ကျပ်သားနှင့် ငွေကျပ်သိန်း ၃၀၀၊ လက်ကိုင်ဖုန်း ၃ လုံး၊ မြေအရောင်း အဝယ်စာချုပ် ၁ စောင်၊ စုစုပေါင်းကာလတန်ဖိုးငွေကျပ် ၉၈၇ သိန်းခန့်ပျောက်ဆုံးလျက်ရှိကြောင်းတွေ့ရှိသေကြောင့် သန်လျင်မြို့မရဲစခန်း၌ (ပ)၂၉၁/၂၀၂၄၊ ရာဇသတ်ကြီးပုဒ်မ ၃၀၂/၃၉၂ ဖြင့် အမှုဖွင့်လှစ်ကာ တရားခံများ ဖမ်းဆီးရမိရေးဆောင်ရွက်ခဲ့ကြကြောင်း သိရသည်။
အထက်ပါဖြစ်စဉ်မှ တရားခံများဖမ်းဆီးရမိနိုင်ရေးအတွက် လုံခြုံရေးတပ်ဖွဲ့ဝင်များက စုံစမ်းစစ်ဆေးဖော်ထုတ်ခဲ့ရာ နေအိမ်အတွင်း ဝင်ရောက်ကာ သတ်ဖြတ် လုယက်မှုအား ပူးပေါင်းကျူးလွန်သူ သန်လျင်မြို့နယ်၊ သူဌေးကွင်းကျေးရွာ(အရှေ့ပိုင်း)၊ ရွှေနှင်းဆီလမ်းနေသူများ ဖြစ်ကြသည့် အောင်အောင်ဦး(ခ)မှဲ့ကြီး၊ အသက် ၂၃ နှစ်၊ (ဘ)ဦးနိုင်လင်း၊ သန်းဇော်ထွေး(ခ)မိုးဒီ၊ အသက် ၂၁ နှစ်၊ (ဘ)ဦးနိုင်လင်း၊ အောင်ခန့်ဇော်(ခ)ဖားကြီး၊ အသက် ၂၄ နှစ်၊ (ဘ)ဦးအောင်မြင့်နှင့် ဟိန်းကိုကို(ခ)ဟိန်းကို(ခ)ကပ္ပလီ၊ အသက် ၂၆ နှစ်၊ (ဘ)ဦးမြင့်နိုင်တို့ ၄ ဦးအား ဩဂုတ်လ ၉ ရက်နေ့တွင် ၎င်းတို့၏ နေအိမ်အသီးသီး၌ သတ်ဖြတ် လုယက်မှုကျူးလွန်ရာမှ ရရှိခဲ့သည့် သက်သေခံပစ္စည်းများနှင့်အတူ ဖမ်းဆီးရမိခဲ့ကြောင်း သိရသည်။
ဖမ်းဆီးရမိတရားခံများ၏ ထွက်ဆိုချက်အရ အောင်အောင်ဦး(ခ)မှဲ့ကြီးသည် သေဆုံးသူ ဒေါ်သန်းသန်းဆင့်(ခ)မအကြီးမအား အကြွေးများမပေးဆပ်လိုခြင်းနှင့် လောင်းကစားပြုလုပ်ရာမှ ငွေကြေးလိုအပ်မှုများရှိနေသောကြောင့် ဒေါ်သန်းသန်းဆင့်(ခ)မအကြီးမ၏ နေအိမ်အတွင်း ဝင်ရောက် သတ်ဖြတ်လုယက်ရန် ပြစ်မှု ကျူးလွန်ရာတွင် ပါဝင်သူ တရားခံများနှင့် ဇူလိုင်လ ၃၀ ရက်နေ့တွင် ကြိုတင်တိုင်ပင်ကြံစည်ခဲ့ခြင်းဖြစ်ကြောင်း၊ အခင်းဖြစ်နေ့တွင် အောင်အောင်ဦး(ခ)မှဲ့ကြီးနှင့် အောင်ခန့်ဇော်(ခ)ဖားကြီးတို့ နှစ်ဦးသည် ဒေါ်သန်းသန်းဆင့်(ခ)မအကြီးမ၏ နေအိမ်အတွင်းသို့ ဝင်ရောက်ကာ ဒေါ်သန်းသန်းဆင့်အား အောင်ခန့်ဇော်(ခ)ဖားကြီးမှ ချုပ်နှောင်ပေးပြီး အောင်အောင်ဦး(ခ)မှဲ့ကြီးမှ လည်ပင်းညှစ်၍ သတ်ဖြတ်ကာ နေအိမ်ဘီရိုနှစ်လုံးအတွင်းမှ စုစုပေါင်းငွေကျပ် ၉၈၇ သိန်းတန်ဘိုးရှိ ရွှေထည်ပစ္စည်းများ၊ လက်ကိုင်ဖုန်းများ၊ ငွေများနှင့် မြေအရောင်းအဝယ်စာချုပ် ၁ စောင်တို့အား လုယက် ယူဆောင်ခဲ့ကြကြောင်း သိရသည်။
လုယက်ပြီးနောက် နေအိမ်အနီးတွင် အခြေအနေစောင့်ကြည့်ပေးနေသူ ဟိန်းကိုကို(ခ)ဟိန်းကို(ခ)ကပ္ပလီအား ခေါ်ဆောင်ကာ အောင်သပြေလမ်း၊ ချောင်းကူး တံတားအနီးတွင် အသင့်စောင့်ဆိုင်းနေသည့် သန်းဇော်ထွေး(ခ)မိုးဒီ မောင်းနှင်သော BGO-11 5N/6631 BONGO အမျိုးအစား မော်တော်ယာဉ်ဖြင့် မောင်းနှင် ထွက်ပြေးခဲ့ကြခြင်းဖြစ်ကြောင်း သိရသည်။
ဖြစ်စဉ်တွင် နေအိမ်အတွင်း ဝင်ရောက်ကာ လူသတ်လုယက်မှုကျူးလွန်ခဲ့သူ အောင်အောင်ဦး(ခ)မှဲ့ကြီးပါ တရားခံ ၄ ဦးအား လုံခြုံရေးတပ်ဖွဲ့ဝင်များက အထူးအမှု စစ်အဖွဲ့ ဖွဲ့စည်း၍ ဒုစရိုက်မှုကို မလိုလားသည့် တာဝန်သိပြည်သူများနှင့် ပူးပေါင်းကာ အခင်းဖြစ်ပွားပြီးချိန်မှ အချိန်တိုအတွင်း ဖော်ထုတ်ဖမ်းဆီးနိုင်ခဲ့ပြီး ဖမ်းဆီး ရမိတရားခံများအား ဥပဒေနှင့််အညီ ထိရောက်စွာ အရေးယူနိုင်ရေး ဆက်လက်ဆောင်ရွက်လျက်ရှိကြောင်း သတင်းရရှိသည်။
Telegram»…
https://t.me/positiveanglenews