မေ ၁၃
ကုလသမဂ္ဂအထွေထွေညီလာခံသည် ပါလက်စတိုင်း၏ အပြည့်အဝအဖွဲ့ဝင်ဖြစ်ရေး ကြိုးပမ်းချက်အား ထောက်ခံသည့်ဆုံးဖြတ်ချက်ကို ချမှတ်ခဲ့ကြောင်း သိရသည်။
ကုလသမဂ္ဂအထွေထွေညီလာခံ၌ မေလ ၁၀ ရက်တွင် အဆိုပါကိစ္စရပ်နှင့်ပတ်သက်ပြီး မဲခွဲဆုံးဖြတ်ရာ ထောက်ခံမဲ ၁၄၃ မဲနှင့် ကန့်ကွက်မဲ ကိုးမဲ ထွက်ပေါ်ခဲ့ကြောင်းသိရသည်။ ဆန့်ကျင်သည့်နိုင်ငံများတွင် အမေရိကန်နှင့် အစ္စရေး တိုပါဝင်သည်။
အဆိုပါ ဆုံးဖြတ်ချက်ကို ချမှတ်ခဲ့ပြီးနောက် အစည်းအဝေးခန်းမတစ်ခုလုံး လက်ခုပ်သံများဖြင့် ပြည့်နှက် ခဲ့ပြီး နိုင်ငံကိုယ်စားလှယ်များသည် ကုလသမဂ္ဂဆိုင်ရာ ပါလက်စတိုင်းသံအမတ်ကြီး ရီယတ်မန်ဆော ကို ဝမ်းသာအားရ ပွေ့ဖက်ခဲ့ကြသည်။
ကုလသမဂ္ဂအထွေထွေညီလာခံ၏ ဆုံးဖြတ်ချက်သည် ပါလက်စတိုင်းအား အပြည့်အဝပါဝင်ရန် အရည်အချင်းပြည့်မီကြောင်း အသိအမှတ်ပြုခြင်းဖြစ်သည်။ အပြည့်အဝအဖွဲ့ဝင်နိုင်ငံဖြစ်လာစေရန် လုံခြုံရေး ကောင်စီ၏ ထောက်ခံချက်လိုအပ်သည်။
သို့သော် အမေရိကန်ကိုယ်စားလှယ်အဖွဲသည် ပြီးခဲ့သည့်လက ယင်းဆုံးဖြတ်ချက်ကို ဗီတိုအာဏာဖြင့် ပယ်ချခဲ့သည်။ အမေရိကန်အနေဖြင့် ပါလက်စတိုင်းကို ဆန့်ကျင်ဘက် ပြုခြင်းမဟုတ် ကြောင်း၊ ထောက်ခံ ပါကြောင်းနှင့် အဓိပ္ပာယ်ရှိစွာဖြင့် အဖွဲ့ဝင်ဖြစ်လာရန်မျှော်မှန်းကြောင်း ကုလသမဂ္ဂဆိုင်ရာ အမေရိကန် လက်ထောက်သံအမတ်ကြီး ရောဘတ်ဝု က ဆိုသည်။
နိုင်ငံများကြား တိုက်ရိုက်ညှိနှိင်းဆွေးနွေးမှုများပါဝင်သည့် လုပ်ငန်းစဉ်များ ဆောင်ရွက်ပြီးမှသာလျှင် ပါလက်စတိုင်းအား အပြည့်အဝအဖွဲဝင်နိုင်ငံဖြစ်လာစေရန် အသိအမှတ်ပြုမည်ဖြစ်ကြောင်း ၎င်းက ဆက်လက် ပြောကြားသည်။
ကုလသမဂ္ဂအထွေထွေညီလာခံ၏ ဆုံးဖြတ်ချက်ကို အစ္စရေးနိုင်ငံခြားရေးဝန်ကြီး ကတ်ဇ် က ဝေဖန်ခဲ့ပြီး ကုလသမဂ္ဂအဖွဲ့သည် လွဲမှားပြီး အဓိပ္ပာယ်မဲ့သည့်ဆုံးဖြတ်ချက်ကို ချမှတ်ခဲ့ကြောင်း ဆိုရှယ်မီဒီယာတွင် ပြောကြားခဲ့သည်။
Telegram»…
https://t.me/positiveanglenews/22524