ဧပြီ ၁၇

တနင်္သာရီတိုင်းဒေသကြီး၊ ပုလောမြို့နယ်၊ ပလောက်မြို့ ပြည်သူ့ဆေးရုံအား ယနေ့ညနေပိုင်းတွင် အကြမ်းဖက်သမားများက Drop Bomb များဖြင့် ယုတ်မာ ရက်စက်စွာ ပစ်ချတိုက်ခိုက်ခဲ့ကြောင်း သိရှိရသည်။

ဖြစ်စဉ်မှာ ယမန်နေ့ညနေ ၄ နာရီခန့်တွင် ပုလောမြို့နယ်၊ ပလောက်မြို့ ပြည်သူ့ဆေးရုံအား အကြမ်းဖက်သမားများက ဆေးရုံ၏ အရှေ့မြောက်ဘက် မီတာ ၁၅၀၀ ခန့်အကွာမှနေ၍ Drone ဖြင့် Drop Bomb ၁ လုံး လာရောက်ပစ်ချ တိုက်ခိုက်ခဲ့သဖြင့် ဆေးရုံ၏ ကလေးကုသဆောင်ပေါ်သို့ ကျရောက်ပေါက်ကွဲ ခဲ့ပြီး အဆိုပါ ကလေးကုသဆောင်၌ ဆေးရုံတက်ရောက်ကုသနေသည့် ကလေးငယ် ၁ ဦး နှင့် လူနာစောင့် အပြစ်မဲ့ဒေသခံပြည်သူ ၆ ဦး ထိခိုက်ဒဏ်ရာရရှိခဲ့ ကြောင်း သိရှိရသည်။

အထက်ပါ ဖြစ်စဉ်မှ ထိခိုက်ဒဏ်ရာရရှိသူများအား ပြည်သူ့ဆေးရုံ၌ ဆေးကုသမှုခံယူစေလျက်ရှိကြောင်းနှင့် ယခုကဲ့သို့ ပြည်သူ့ဆေးရုံပေါ်သို့ Drop Bomb ပစ်ချတိုက်ခိုက်ခြင်းသည် ဂျီနီဗာကွန်ဗန်းရှင်းနှင့် အပြည်ပြည်ဆိုင်ရာ ဥပဒေတို့အရ စစ်ရာဇဝတ်မှု(War Crime)ကို ကျူးလွန်ခြင်းဖြစ်ပြီး အဆိုပါ အကြမ်းဖက်မှုကို ကျူးလွန်ခဲ့သည့် အကြမ်းဖက်သမားများအား အမြန်ဆုံးဖော်ထုတ်ဖမ်းဆီး၍ ဥပဒေနှင့် အညီ အပြစ်ပေးအရေးယူနိုင်ရေး ဆက်လက်ဆောင်ရွက်လျက်ရှိကြောင်း သတင်းရရှိသည်။