မတ် ၅
ကချင်ပြည်နယ်၊ မြစ်ကြီးနားမြို့၊ မြို့သစ်ရပ်ကွက်၊ ယူနန်ဘုံကျောင်းလမ်းဆုံတွင် ယနေ့ နံနက် ၉ နာရီအချိန်ခန့်က ယာဉ်တိုက်မှုတခုဖြစ်ပွားခဲ့ကြောင်း သိရသည်။
စည်ပင်သာယာလမ်းအတိုင်း ယုဇနရပ်ကွက်မှ မြို့သစ်ရပ်ကွက်သို့မောင်းနှင်လာသည့် တိုယိုတာ NOAH အိမ်စီးကားမှာ ရွှေတောင်ကြားလမ်းအတိုင်း တောင်မှမြောက်သို့မောင်းနှင်လာရာကုမ္ပဏီတစ်ခု၏ကုန်တင်ကားကို ဝင်တိုက်ခဲ့ကြောင်း သိရသည်။
အိမ်စီကားမှာကုန်တင်ကားကို ဝင်တိုက်သည့်အရှိန်ကြောင့် ကုန်တင်ကားမှာတိမ်းမှောက်သွားခဲ့ပြီး ကားငယ်ပေါ်ပါလာသည့်ယာဉ်မောင်းနှင့်ယာဉ်နောက်လိုက်တို့ ပြင်းထန်သောထိခိုက်ဒဏ်ရာရရှိခြင်းမရှိကြောင်း သိရသည်။
အဆိုပါဖြစ်ပွားသည့်နေရာသည် မကြာခဏ ယာဉ်တိုက်မှုဖြစ်လေ့ရှိသည့်နေရာဖြစ်ကြောင်း ယာဉ်စည်းကမ်းထိန်းသိမ်းရေးအဖွဲ့ တာ၀န်ရှိသူထံမှ သိရသည်။
