ဖေဖော်ဝါရီ ၈
မြန်မာပြည်တောင်ဘက်စွန်းရှိ ကော့သောင်းနှင့် မြိတ်ကျွန်းစု၌ နေထိုင်ကျက်စားကြသောပင်လယ်ပျော် မော်ကင်း(ခေါ်) ဆလုံတိုင်းရင်းသား (Sea Gypsies)တို့၏ ရိုးရာယဉ်ကျေးမှုတစ်ခုဖြစ်သည့် ရိုးရာနတ်ကပွဲကို ဖေဖော်ဝါရီလ ဒုတိယပတ်နှင့် မတ်လအတွင်း ကျင်းပသွားမည်ဖြစ်ကြောင်း သိရသည်။
ကော့သောင်းမြို့နယ် စူငယ်ဘာလိုင်းကျေးရွာအုပ်စု မကြုံဂလက်ကျေးရွာ၌ ဆလုံနှင့်မြန်မာ၊ ညောင်ပင်အော်ကျေးရွာ၌ ကရင်လူမျိုးများနေထိုင်ကြပြီး အဆိုပါ ရိုးရာနတ်ကပွဲကို လက်ဆင့်ကမ်း အမွေတစ်ခုအဖြစ် ယနေ့တိုင် ကျင်းပလျက်ရှိကာ နတ်ဆရာများ စုပေါင်းပြီး ကျေးရွာအလိုက် ကျင်းပလေ့ရှိကြောင်း သိရသည်။
ဆလုံရိုးရာ နတ်ကပွဲကို ပင်လယ်ပြင်၌ တစ်နှစ်ပတ်လုံး ငါး၊ ပုစွန် ပေါများစွာရရှိစေရန်၊ ကျန်းမာရေး ကောင်းမွန်စေရန်နှင့် ရိုးရာအမွေထိန်းသိမ်းမှုအဖြစ် ကျင်းပလေ့ရှိပြီး အဆိုပါနတ်ပွဲများကို ဖေဖော်ဝါရီ ၁၁ ရက်၌ ညောင်ဝှီးကျွန်း၊ ဖေဖော်ဝါရီ ၁၂ ရက်တွင် လငန်းကျေးရွာနှင့် မတ် ၁၀ ရက်တွင် မကြုံဂလက်ကျေးရွာတို့၌ ကျင်းပသွားမည်ဖြစ်ကြောင်း သိရသည်။ ကော့သောင်းမြို့နယ် အနီးရှိ ကျွန်းများနှင့် မြိတ်ကျွန်းစု၌ ဆလုံတိုင်းရင်းသားအများစု နေထိုင်လျက်ရှိပြီး မကြုံဂလက် ကျေးရွာ၌ အိမ်ခြေ ၄၀၀ ခန့်ဖြင့် ဆလုံတိုင်းရင်းသား အများဆုံးနေထိုင်လျက်ရှိရာ အစည်ကားဆုံး ရိုးရာနတ်ကပွဲအဖြစ် မကြုံဂလက်ကျေးရွာ၌ ရှေးယခင်မှစ၍ ယနေ့တိုင် အစဉ်အလာမပျက် ကျင်းပလျက်ရှိသည်။ ဆလုံတို့သည် ဗုဒ္ဓဘာသာနှင့်ခရစ်ယာန်ဘာသာ ကိုးကွယ်ကြပြီး အချို့မှာ နတ်ကိုးကွယ်ကြကြောင်း သိရသည်။
“ဆလုံတိုင်းရင်းသားတွေရဲ့ နတ်ကပွဲဟာ မဖြစ်မနေ လုပ်ဆောင်ကြတဲ့ ရိုးရာပွဲတစ်ခုလည်း ဖြစ်ပါတယ်။ ကျေးရွာတွေမှာရှိတဲ့ နတ်ဆရာတွေစုပြီး နတ်ပွဲကျင်းပမယ့်ရွာကို သွားရောက်လေ့ ရှိပါတယ်။ နတ်ကပွဲ ကျင်းပချိန်မှာ ပင်လယ်ပြင်ထွက်ခွာလေ့ မရှိပါဘူး။ တစ်နှစ်ပတ်လုံး အစစအရာရာ အဆင်ပြေအောင် နတ်ကပွဲ လုပ်ဆောင်ကြတာပါ။ တိုင်းရင်းသားထဲမှာ ဆလုံတိုင်းရင်းသားဟာ လူဦးရေအနည်းဆုံးဖြစ်တဲ့အပြင် ပင်လယ်ပြင်ကိုအမှီပြုပြီး ဘဝရှင်သန်နေထိုင်သူတွေလည်း ဖြစ်ပါတယ်။ အရင်ကဆိုရင် ဆလုံနတ်ပွဲမှာ ပြည်တွင်း၊ ပြည်ပခရီးသွားတွေ လာရောက်လည်ပတ်တာလည်း ရှိပါတယ်။ ဆလုံရိုးရာ နတ်ပွဲကျင်းပဖို့ တိုင်းဒေသကြီးအစိုးရက ကူညီထောက်ပံ့ပေးတာလည်း ရှိပါတယ်” ဟု ကျွန်းစုမြို့နယ် မော်ကင်းဆလုံစာပေနှင့် ယဉ်ကျေးမှုအသင်း ဥက္ကဋ္ဌ ဦးငွေဝင်းက ပြောသည်။
ဆလုံတိုင်းရင်းသားများအနေဖြင့် ရိုးရာနတ်ကပွဲများကို နှစ်စဉ်ကျင်းပလျက်ရှိသော်လည်း နတ်ကိုးကွယ်မှု လျော့နည်းလာလျက်ရှိကာ ယခင်က နတ်ဆရာတို့ထံ ဆေးကုသကြရာမှ ယခုအခါ ကျေးလက်ဆေးခန်း၌ ကုသကြပြီး ပညာရေးနှင့် ကျန်းမာရေးအသိ ပွင့်လင်းလာလျက်ရှိကာ မော်ကင်းဆလုံစာပေနှင့် ယဉ်ကျေးမှုအသင်းမှ ဆလုံတိုင်းရင်းသားတို့၏ ယဉ်ကျေးမှုနှင့် လူမှုဘဝဖွံ့ဖြိုးမှုအတွက် တိုင်းဒေသကြီးအစိုးရအဖွဲ့၏ ညွှန်ကြားမှုနှင့်အညီ ဆောင်ရွက်လျက်ရှိကြောင်း တိုင်းဒေသကြီးအစိုးရအဖွဲ့၏ အစီအမံဖြင့် ဆလုံတိုင်းရင်းသားတို့၏ လူမျိုးစုမှတ်တမ်းရိုက်ကူး၍ နိုင်ငံတကာခရီးသွားများ ပိုမိုသိရှိလည်ပတ်နိုင်ရေး စီမံဆောင်ရွက်နေကြောင်း သိရသည်။
သစ္စာ(mna)
#PAN
Telegram Link
https://t.me/positiveanglenews
