![](https://positiveanglenews.com/storage/2023/12/IMG_20231210_132437_890.jpg)
ဒီဇင်ဘာ ၁၀
ယခုနှစ်အတွင်း CMP လက်ခစားစနစ်ဖြင့် အထည်ချုပ်လုပ်နေသည့် အထည်ချုပ်စက်ရုံများအတွက် ပြည်ပနိုင်ငံများမှ မြန်မာနိုင်ငံအတွင်းသို့ အထည်လိပ်ကုန်ကြမ်းတင်သွင်းမှု အမေရိကန်ဒေါ်လာ ၁ ဘီလီယံကျော် ရှိကြောင်း စီးပွားရေးနှင့်ကူးသန်းရောင်းဝန်ကြီးဌာနမှ သိရပါသည်။
ပြည်ပနိုင်ငံများမှ အထည်လိပ်ကုန်ကြမ်းကို တင်သွင်းရာတွင် တရုတ်နိုင်ငံမှ ၉၀ ရာခိုင်နှုန်းကျော် တင်သွင်းနေခြင်းဖြစ်ကြောင်းနှင့် နိုင်ငံအတွင်းက အထည်ချုပ်စက်ရုံများအတွက် လိုအပ်နေသည့် CMP အထည်လိပ်ကုန်ကြမ်းများကို လုပ်ငန်းအပ်နှံထားသည့် ပြည်ပနိုင်ငံများက တရုတ်နိုင်ငံ ဈေးကွက်မှတစ်ဆင့် ကုန် ကြမ်းပစ္စည်းများ အဓိကတင်သွင်းလျက် ရှိနေသည်ဟုဆိုပါသည်။
၂၀၂၂ – ၂၀၂၃ ဘဏ္ဍာနှစ်အတွင်း အထည်ချုပ်ကဏ္ဍမှ အမေရိကန်ဒေါ်လာ ၅ ဒသမ ၃ ဘီလီယံပမာ ဏခန့် တင်ပို့နိုင်ခဲ့ပြီး၊ ချုပ်ပြီးအထည်များကို နိုင်ငံပေါင်း ၁၀၀ သို့ တင်ပို့နိုင်ခဲ့သည်ဟု သိရပါသည်။
ယခုဘဏ္ဍာနှစ်တွင် နိုင်ငံတွင်းသို့ အထည်ချုပ်လုပ်ငန်းများက ချုပ်လုပ်ထားသည့် CMP စနစ်နှင့်ချုပ်သည့် အထည်များကို နိုင်ငံပေါင်း ၈၀ ကျော်ကို အဓိကထားပြီး တင်ပို့လျက်ရှိနေပါသည်။
ဂျပန်၊ ပိုလန်၊ စပိန်၊ ဂျာမနီ၊ ကိုရီးယား၊ ယူကေ၊ နယ်သာလန်၊ ပြင်သစ်၊ အီတလီ၊ အမေရိကန်၊ ဒိန်းမတ်နှင့် ဘယ်လ်ဂျီယံ စသည့် အနောက် နိုင်ငံများမှာ မြန်မာ့ချုပ်ထည်များကို အဓိကတင်ပို့သည့် ဈေးကွက်များဖြစ်ကြောင်း စီးပွားရေးနှင့်ကူးသန်းရောင်းဝန်ကြီးဌာနမှ သိရပါသည်။
#PAN