သြဂုတ် ၂၅
ကုလသမဂ္ဂလုံခြုံရေးကောင်စီ၌ ၂၃ – ၈ – ၂ဝ၂၃ ရက်တွင် မြန်မာနိုင်ငံဆိုင်ရာ တံခါးပိတ်ဆွေးနွေးပွဲ တစ်ရပ်ပြုလုပ်ခဲ့ပြီးနောက် ကောင်စီအဖွဲ့ဝင် ၁၃ နိုင်ငံဖြစ်သည့် အယ်လ်ဘေးနီးယား၊ ဘရာဇီးလ်၊ အီကွေဒေါ၊ ပြင်သစ်၊ ဂါဘွန်၊ ဂါနာ၊ ဂျပန်၊ မော်လ်တာ၊ မိုဇမ်ဘစ်၊ ဆွစ်ဇာလန်၊ ယူအေအီး၊ အမေရိကန်နှင့် ဗြိတိန်နိုင်ငံတို့၏ ပူးတွဲထုတ်ပြန်ချက် (Joint Statement) ကို ဗြိတိန်နိုင်ငံက ဖတ်ကြားခဲ့သည်ကို တွေ့ရှိရသည်။
တံခါးပိတ်ဆွေးနွေးမှုတွင် မြန်မာနိုင်ငံသို့ ၁၅-၈-၂ဝ၂၃ ရက်မှ ၁၇-၈-၂ဝ၂၃ ရက်အထိ လာရောက် ခဲ့သည့် ကုလသမဂ္ဂလူသားချင်းစာနာထောက်ထားမှုဆိုင်ရာနှင့် အရေးပေါ်ကယ်ဆယ်ရေးဆိုင်ရာ ညှိနှိုင်း ရေးမှူး Under Secretary General Mr. Martin Griffiths နှင့် ကုလသမဂ္ဂနိုင်ငံရေးနှင့် ငြိမ်းချမ်းရေး တည်ဆောက်မှုဆိုင်ရာရုံးမှ Assistant Secretary-General Mr. Khaled Khiari တို့ကို ရှင်းလင်း ဆွေးနွေးစေခဲ့ကြောင်းသိရှိရသည်။
လုံခြုံရေးကောင်စီအဖွဲ့ဝင် (၁၃) နိုင်ငံ၏ ထုတ်ပြန်ချက်တွင် မြန်မာနိုင်ငံနှင့်ပတ်သက်၍ ဝင်ရောက်စွက်ဖက်ပြီး မှန်ကန်မှုမရှိသောဖော်ပြချက်များပါရှိသည်။ မြန်မာနိုင်ငံ၌ အကြမ်းဖက် အဖွဲ့အစည်းများ၏ လူမဆန်သောတိုက်ခိုက်မှုများကြောင့် အပြစ်မဲ့ပြည်သူပေါင်း ၆၃ဝဝ ကျော် အသက် ဆုံးရှုံးခဲ့ရပြီးဖြစ်သည်။ မြန်မာအစိုးရအနေဖြင့် အများပြည်သူ၏အသက်အိုးအိမ်ကို ကာကွယ် စောင့်ရှောက်ရန် လိုအပ်သည့်လုံခြုံရေးဆိုင်ရာအရေးယူမှုများကို အတတ်နိုင်ဆုံးထိန်းသိမ်းဆောင်ရွက် လျက်ရှိသည်။ လုံခြုံရေးကောင်စီအဖွဲ့ဝင်အချို့၏ ထုတ်ပြန်ချက်သည် ယင်းအကြမ်းဖက်မှုများကို မျက်ကွယ်ပြုထားသဖြင့် ဘက်လိုက်မှုရှိကြောင်း ထင်ရှားစွာတွေ့ရှိရသည်။ မြန်မာနိုင်ငံအနေဖြင့်လွတ်ငြိမ်းချမ်းသာ ခွင့်အကြိမ် ၂ဝ ကျော်ဖြင့် အကျဉ်းသား ၇၆,ဝဝဝ ကျော်ကို ပြစ်ဒဏ်လွတ်ငြိမ်းခွင့်ပြုခဲ့ ခြင်း၊ ယနေ့အထိ နိုင်ငံရေးပါတီ ၃ဝ ကျော်ကို ဖွဲ့စည်းမှတ်ပုံ တင်ခွင့်ပြုခဲ့ခြင်းနှင့် ငြိမ်းချမ်းရေးဆွေးနွေးမှု အကြိမ်ပေါင်း ၁၁၉ ကြိမ် ပြုလုပ်ခြင်းတို့ကို ဆောင်ရွက်ခဲ့သည်။ မြန်မာနိုင်ငံအနေဖြင့် ရခိုင် ပြည်နယ်မှ နေရပ်စွန့်ခွာသူ ၅ဝဝ,ဝဝဝ ကျော်အား ပြန်လည်လက်ခံရေးလုပ်ငန်းစဉ်နှင့်ပတ်သက်၍ ၂ဝ၁၇ ခုနှစ်နှင့် ၂ဝ၁၈ ခုနှစ်များတွင် မြန်မာနှင့် ဘင်္ဂလားဒေ့ရှ်နိုင်ငံတို့အကြား သဘောတူညီချက်များကို ကိုင်စွဲ၍ ဆက်လက်ဆောင်ရွက်လျက်ရှိသည်။
အစိုးရအနေဖြင့် လူသားချင်းစာနာထောက် ထားမှုအကူအညီများအတွက် ကုလသမဂ္ဂအပါ အဝင် နိုင်ငံတကာအသိုက်အဝန်းနှင့် ပူးပေါင်းဆောင်ရွက်လျက်ရှိသည်။ တိုင်းဒေသကြီးများနှင့် ပြည်နယ်များ တွင် ရုံးခွဲများဖွင့်လှစ်ခွင့်ပြုထားပြီး ခရီးသွားလာခွင့်များပေးအပ်လျက်ရှိရာ ရန်ကုန်မြို့ရှိ ဗြိတိန်နှင့် ဆွစ်ဇာလန်သံတမန်များအပါအဝင်ဖြစ်သည်။ လူသားချင်းစာနာမှုလိုအပ်သူများအရေအတွက်ကို တွက်ချက် ရာတွင် ဖွံ့ဖြိုးရေးအကူအညီလိုအပ်သူများကိုပါ ထည့်သွင်းတွက်ချက်ထားခြင်းဖြင့် ကိန်းဂဏန်းများ အဆ မတန်ဖောင်းပွလျက်ရှိပြီး မြေပြင်အနေအထားနှင့်ကိုက်ညီမှုမရှိကြောင်း ဖော်ပြအပ်သည်။ မြန်မာ နိုင်ငံသည် ကုလသမဂ္ဂနှင့် လက်တွေ့ကျသောပူးပေါင်းဆောင်ရွက်မှုများမှတစ်ဆင့် လိုအပ်သောပြည်သူ များအတွက် အကူအညီများရရှိစေရန် UNOCHA အကြီးအကဲ၏ခရီးစဉ်ကို ညှိနှိုင်းဆောင်ရွက်ပေးခဲ့ ခြင်းဖြစ်သည်။
မြန်မာနိုင်ငံ၏အခြေအနေသည် ဒေသတွင်းနှင့်နိုင်ငံတကာ ငြိမ်းချမ်းရေးနှင့် လုံခြုံရေးအပေါ် သက်ရောက်မှုမရှိဘဲ ပြည်တွင်းရေးသာဖြစ် သည်။ လုံခြုံရေးဆုံးဖြတ်ချက်အဆို ၂၆၆၉ တွင် နိုင်ငံရေး သွတ်သွင်းမှုများစွာပါဝင်သည်။ လူသားချင်းစာနာထောက်ထားမှုနှင့် လူ့အခွင့်အရေးကိစ္စရပ်များသည် အခြားကုလသမဂ္ဂရုံးများ၏ လုပ် ပိုင်ခွင့်များတွင် ပါဝင်ပြီးဖြစ်၍ ယခုလုံခြုံရေးကောင်စီတွင် ဆွေးနွေး ခြင်းမှာ ဆီလျော်မှုမရှိကြောင်း တွေ့ရှိရသည်။ မြန်မာနိုင်ငံအနေဖြင့် နိုင်ငံ့အရေးဆောင်ရွက်ရာတွင် ၂ဝဝ၈ ခုနှစ်၊ ဖွဲ့စည်းပုံအခြေခံဥပဒေ၊ တည်ဆဲဥပဒေများ၊ မြန်မာနိုင်ငံ ၏ အခြေခံမူဝါဒရပ်တည်ချက်များနှင့် အညီသာ ဆောင်ရွက်သွားမည်ဖြစ်ကြောင်း ထပ်လောင်းဖော်ပြအပ်သည်။
နိုင်ငံခြားရေးဝန်ကြီးဌာန
၂ဝ၂၃ ခုနှစ်၊ ဩဂုတ်လ ၂၄ ရက်။
#PAN