ဩဂုတ် ၁၀
ကရင်ပြည်နယ်အတွင်း မိုးအဆက်မပြတ်ရွာသွန်းမှုကြောင့် မြစ်ရေ၊ချောင်းရေလျှံခြင်း၊ မြေပြိုကျခြင်းများ ဖြစ်ပေါ်လျက်ရှိခြင်းကြောင့် ဩ ဂုတ်လ ၇ ရက်နေ့က မြ၀တီ – ကော့ကရိတ် အာရှကားလမ်းမကြီး၊ တောနော်ရေတံခွန်အနီး မိုင်တိုင်အမှတ်(၁၄၉)နှင့်(၁၅၀)အကြားနေရာတွင် ကားလမ်းအောက်ခံမြေသား အကျယ် ၃၃ ပေရှိ ကတ္တရာခင်းကားလမ်းအရှည် ၁၅ဝ ပေခန့် ပဲ့ကျပျက်စီးခဲ့ရာ ယာဉ်သွားလာမှုယာယီရပ်ဆိုင်းထားရပြီး အဆိုပါ လမ်းပိုင်းအမြန်ဆုံးပြန်လည်ပြုပြင်နိုင်ရေး ကရင်ပြည်နယ်လုံခြုံ ရေးနှင့်နယ်စပ်ရေးရာဝန်ကြီး ဗိုလ်မှူးကြီးမျိုးမင်းနောင် ဦးဆောင်ပြီး လမ်းဦးစီးဌာနညွှန်ကြားရေးမှူးချုပ်နှင့် တာဝန်ရှိသူများက လိုအပ်သည့် ပြင်ဆင်မှုများ ပြုလုပ်နိုင်ရန် ယမန်နေ့က ကွင်းဆင်းကြည့်ရှုခဲ့ကြောင်း သိရပါသည်။
အဆိုပါ အာရှလမ်းမကြီးမြေပြိုမှုနှင့် ပတ် သက်ပြီး မော်တော်ယာဥ်များ ယာယီသွားလာနိုင်ရန် ဘေလီတံတားထိုးသည့်အခါမှာ လမ်းပမ်းဆက်သွယ်ရေးပြတ်တောက် မှုမဖြစ်ပေါ်စေရေးအတွက် လမ်းပြတ်ကျတဲ့နေရာ၏ တစ်ဖက်တစ် ချက်စီတွင် ၃၀၀ ပေ ချဉ်းကပ်လမ်းသစ်ကို တောင်ဖြတ်ဖောက်လုပ်ဆောင်ရွက်ရမည်ဖြစ် ကြောင်း၊ ရှောင်ကွင်းလမ်းအနေနှင့် စုစုပေါင်းအရှည် ၈၀၀ ပေခန့် ဖောက်လုပ်ရမှာ ဖြစ်ကြောင်း၊ဝန်ပါကားများပါ ဖြတ်သန်းနိုင်ရေးအတွက် လမ်းမြေသားပေါ်၌ ဘေလီတံတား အရှည် ၂၀၀ ပေခန့် ထိုးပေးရမှာဖြစ်ကြောင်း၊ တစ်လအတွင်း အပြီးဆောင်ရွက်သွားမှာဖြစ်ပြီး ဩဂုတ် ၁၀ ရက်နေ့ကစပြီး လုပ်ငန်းစတင် ဆောင်ရွက်မှာဖြစ်ရာ ကုန်တင်ယာဉ်ကြီးများ ဖြတ်သန်းသွားလို့မရသေးဘဲ လူစီးယာဉ်များနှင့် အချို့ပစ္စည်းသယ်ယာဉ်ငယ်လေးများကို ယခင်ကအသုံးပြုခဲ့တဲ့ မြဝတီ-ကော့ကရိတ် လမ်းဟောင်းဖြစ်သည့် ထို့ကော်ကိုးလမ်းပိုင်းကနေ နေ့စဉ်သွားလို့ရအောင် စီစဉ်ဆောင်ရွက်ပေးထားပါကြောင်း စသည်ဖြင့် လမ်းပြန်လည်ပြုပြင်မည့်အခြေအနေများနှင့်ပတ် သက်၍ ကရင်ပြည်နယ် လမ်းဦးစီးဌာနမှ တာဝန်ရှိသူက ရှင်းလင်းပြောကြားခဲ့သည်။
”ပင်မလမ်းမကြီးပျက်စီးမှုကို ပွင့်လင်းရာသီအချိန်မှာတံတားဦးစီးဌာနမှ ဖြစ်ပေါ်လာနိုင်တဲ့ ရေအားပမာဏကို တွက်ချက်ပြီး ရေထွက်ပြွန် (Culvert) သို့မဟုတ် တံတား(Bridge) တည် ဆောက်သွားမှာဖြစ်ပါတယ်၊ အခုလိုအပ်တဲ့ ပစ္စည်းများနဲ့ စက်ယန္တရားများ ရွှေ့ပြောင်းသယ် ယူပို့ဆောင်နေပါပြီ ” ဟု ကရင်ပြည်နယ်လမ်းဦးစီးဌာန ညွှန်ကြားရေးမှူး ဦးအောင်ညို က PAN ကို ရှင်းလင်း ပြောပြခဲ့သည်။
မြဝတီ-ကော့ကရိတ် အာရှလမ်းမကြီးသည် ထိုင်း – မြန်မာ ကုန်စည်စီးဆင်းရာ အဓိကလမ်း ကြောင်းထဲတွင် ပါဝင်နေပြီး ကုန်တင်ယာဉ်များ နေ့စဉ် ဖြတ်သန်းသွားလာနေသည့် လမ်းဖြစ်သည့်အပြင် မြဝတီမြို့နှင့် ရန်ကုန်မြို့သို့ ပြေးဆွဲနေသည့် ခရီးသည်တင်ယာဉ်များ၊ အိမ်စီးယာဉ်များ နေ့စဉ် ဖြတ်သန်းသွားလာနေသည့် လမ်းကြောင်း တစ်ခုဖြစ်ကြောင်း၊ မြန်မာနိုင်ငံအနေဖြင့် ထိုင်း နိုင်ငံမှ စားသောက်ကုန်၊ဆောက်လုပ်ရေးလုပ်ငန်းသုံးပစ္စည်း၊ ဆေးနှင့်ဆေးပစ္စည်း၊ သစ်သီးနှင့် အခြားပစ္စည်းများ တင်သွင်းနေသော လမ်းပိုင်းဖြစ်ကြောင်း သိရှိရသည်။
အဆိုပါ လမ်းပိုင်းကို အမြန်ဆုံးပြန်လည်ပြုပြင်နိုင်ရေး ကရင်ပြည်နယ်လုံခြုံရေးနှင့် နယ်စပ်ရေးရာဝန်ကြီးနှင့်အဖွဲ့ သွားရောက်စစ်ဆေးကြည်ရှု့စဥ် KTLA နှင့် PDF အကြမ်းဖက်သောင်းကျန်းသူများက အဝေးမှ လက်နက်ငယ်ဖြင့် အချက် ၄၀ ခန့် နှောက်ယှက်ပစ် ခတ်ခဲ့ကြောင်း၊ လူ/ပစ္စည်း ထိခိုက်ပျက်စီးမှု မရှိကြောင်း သတင်းရရှိပါသည်။