(မှုခင်း) ဒီဇင်ဘာ ၃၁
မန္တလေးမြို့ “နဂါးနန်းတော်” စိန်ရွှေရတနာဆိုင်နှင့် “ဆင်ဖြူတော်” ငွေလွှဲလုပ်ငန်းတို့အားသေနတ်ပြခြိမ်းခြောက်၍ လုယက်မှုကျူးလွန်သူ PDF အမည်ခံ အကြမ်းဖက်အဖွဲ့ဝင် ၂ ဦးပါ တရားခံ အမျိုးသား ၅ ဦးအား သက်သေခံရွှေထည်ပစ္စည်းနှင့်ငွေများ၊ လုယက်မှုကျူးလွန်ရာတွင် အသုံးပြုသည့် လက်နက်၊ ခဲယမ်းများနှင့်အတူ ဖော်ထုတ်ဖမ်းဆီးရမိသည်ဟု သိရသည်။
ပြီးခဲ့သည့် ဒီဇင်ဘာလ ၂၆ ရက်နေ့ နံနက် ၈ နာရီ ၅၀ မိနစ်တွင် မန္တလေးတိုင်းဒေသကြီး ချမ်းအေးသာစံမြို့ နယ်၊ ကဉ္စနမဟီရပ်ကွက်၊ ၇၇ လမ်း၊ ၃၂ လမ်းနှင့် ၃၃ လမ်းကြားရှိ “နဂါးနန်းတော်”စိန်ရွှေရတနာဆိုင်၌ ဆိုင်ပိုင်ရှင်ဖြစ်သူ ဒေါ်ဥမ္မာအေး(၅၂)နှစ်ပါ ဆိုင်ဝန်ထမ်း ၆ ဦးတို့ရှိနေစဉ် အမျိုးသားနှစ်ဦး(စိစစ်ဆဲ)က ဆိုင်ကယ်တစ်စီးဖြင့် ရောက်ရှိလာပြီး ဆိုင်ဝန်ထမ်းများအားသေနတ်ပြခြိမ်းခြောက်ကာ ဆိုင်ရှိ ရွှေထည်ပစ္စည်းမျိုးစုံ(ရွှေအလေးချိန် ၁ ပိဿာ ၉၁ ကျပ်သားခန့်၊စုစုပေါင်း တန်ဖိုးငွေ ၁၀,၅၀၅ သိန်းကျပ် ခန့်)နှင့် ငွေစက္ကူရောရာကျပ်သိန်း ၃၀ ခန့်တို့အားလုယက်ယူဆောင်ထွက်ပြေးသွားခဲ့သည့် ဖြစ်စဉ်ဖြစ်ပွားခဲ့သည်ဟု သိရသည်။
အဆိုပါဖြစ်စဉ်နှင့်ပတ်သက်၍ လုံခြုံရေးတပ်ဖွဲ့ဝင်များက တရားခံများအား ဖော်ထုတ်ဖမ်းဆီးနိုင်ရေး အခင်းဖြစ်ရပ်မှတ်တမ်းများရယူခြင်း၊ နယ်မြေအတွင်း သတင်းရယူ စုံစမ်းခြင်းများဆောင်ရွက်ခဲ့ရာ ဒီဇင်ဘာလ ၂၉ ရက်နေ့ နံနက်ပိုင်းတွင် လုယက်မှုကျူးလွန်သူ တရားခံများဖြစ်ကြသည့် ဖောင်းပြင်မြို့ နယ်၊ ပေါက်ကုန်းကျေးရွာနေ မိုးအောင်(ခ)အောင်မိုး(၂၉)နှစ်နှင့် ဒီပဲယင်းမြို့နယ်၊ ထောင်တန်းကျေးရွာနေ ကျော်စိုးလွင်(ခ)ကျော်ကြီး(ခ)ပြာတာ(၂၉)နှစ်တို့ ၂ ဦးအားအောင်မြေသာစံမြို့နယ်၊ ၂၅ လမ်းနှင့် ၅၃ လမ်းကြားရှိ Nature တည်းခိုခန်းအခန်းအမှတ်(၂၀၉)၌.လုယက်မှုကျူးလွန်စဉ် အသုံးပြုခဲ့သည့် M-5 အမျိုးအစားသေနတ် ၁ လက်၊ ကျည်အိမ် ၁ ခု၊ M-4 A1 Carbine အမျိုးအစား သေနတ် ၁ လက်၊ ကျည်အိမ် ၃ ခု၊ ကျည်မျိုးစုံ ၈၃ တောင့်၊ Click ဆိုင်ကယ် ၁စီး၊ လုယက်မှုကျူးလွန်ရာမှ ရရှိသည့် ရွှေထည်ပစ္စည်းမျိုးစုံ ၁ ပိဿာ ၄၀ ကျပ်သားခန့်၊ ငွေစက္ကူရောရာ ၂၁၅ သိန်းတို့နှင့်အတူ ဖမ်းဆီးရမိခဲ့သည်ဟု သိရသည်။
ဖမ်းဆီးရမိတရားခံမိုးအောင်(ခ)အောင်မိုးနှင့် ကျော်စိုးလွင်(ခ)ကျော်ကြီး(ခ)ပြာတာတို့၏ထွက်ဆိုချက်အရ လုယက်မှုကျူးလွန်ရာတွင် ပူးပေါင်းပါဝင်သူများဖြစ်ကြသည့် ပုသိမ်ကြီးမြို့နယ်၊ နန်းဦးလွင်ကျေးရွာနေ အောင်ပြည့်စုံလွင်(၃၅)နှစ်နှင့် မိုင်ကုန်းရွာနေ သန်းထိုက်ထွန်း(ခ)ငနဲ(၃၃)နှစ်တို့အား ၎င်းတို့၏ နေအိမ်အသီးသီး၌ လုယက်မှုကျူးလွန်စဉ်အသုံးပြုခဲ့သည့် CANDA Wave 110 ဆိုင်ကယ်တစ်စီး၊ မီနီအိုးဝေ ၁ စီးတို့နှင့်လည်းကောင်း၊ လုယက်မှုကျူးလွန်ရာမှ ရရှိခဲ့သည့် ရွှေထည် ပစ္စည်းများအား အရည်ကျိုပုံဖျက်ပေးသူ အောင်မြေသာစံမြို့ နယ်၊ အနှိပ်တော်ရပ်ကွက်နေ ထွန်းမင်းလတ်(ခ)ထွန်းမင်း(၅၀)နှစ် (ဘ)ဦးသင်အား ၎င်း၏နေအိမ်၌ ရွှေထည်ပစ္စည်းများ အရည်ကျို ရာတွင် အသုံးပြုသည့်ပစ္စည်းများနှင့်လည်းကောင်း ယင်းနေ့ နေ့လည်ပိုင်းတွင် အသီးသီး ထပ်မံဖမ်းဆီးရမိခဲ့သည်ဟု သိရသည်။
ဆက်လက်၍ ဖမ်းဆီးရမိတရားခံ မိုးအောင်(ခ)အောင်မိုး၊ ကျော်စိုးလွင်(ခ)ကျော်ကြီး(ခ)ပြာတာ၊ အောင်ပြည့်စုံလွင်နှင့် သန်းထိုက်ထွန်း(ခ)ငနဲတို့အား အခြားလုယက်မှု၊ ဓားပြမှုများနှင့်တိုက်ဆိုင်စစ်ဆေးခဲ့ရာ ၎င်းတို့ ၄ ဦးသည် ဒီဇင်ဘာလ ၂၄ ရက်နေ့ ညနေ ၄ နာရီတွင် မဟာအောင်မြေမြို့နယ်၊ မဟာမြိုင်(၁)ရပ်ကွက်ရှိ ဆင်ဖြူတော် ငွေလွှဲလုပ်ငန်းအား သေနတ်ပြခြိမ်းခြောက်၍ ငွေကျပ်သိန်း ၃၀၀ နှင့် MDY-16/4Q 1196 Ertiga အမျိုးအစား မော်တော်ယာဉ်တစ်စီးတို့အား လုယက်ခဲ့ကြောင်း၊ လုယက်မှုကျူးလွန်းရာမှ ရရှိခဲ့သည့် မော်တော်ယာဉ်အား အမည်မသိအမျိုးသားတစ်ဦးထံ ငွေကျပ်သိန်း ၁၅၀ ဖြင့် ရောင်းချခဲ့ကြောင်း ထပ်မံဖော်ထုတ် သိရှိရသည်ဟု သိရသည်။
စစ်ဆေးချက်များအရ ဖမ်းဆီးရမိတရားခံ မိုးအောင်(ခ)အောင်မိုးသည် စစ်ကိုင်းတိုင်းဒေသကြီး၊ ဒီပဲယင်းမြို့ နယ်၊ ဆပ်ပြာကျင်းကျေးရွာ PDF အကြမ်းဖက်အဖွဲ့မှ ဒုခေါင်းဆောင်ဖြစ်ပြီး ကျော်စိုးလွင်(ခ)ကျော်ကြီး(ခ)ပြာတာသည် ဒီပဲယင်းမြို့ နယ်၊ ဆပ်ပြာကျင်းကျေးရွာအုပ်စု၊ ထောင်တန်းကျေးရွာ PDF အကြမ်းဖက်အဖွဲ့ မှ အဖွဲ့ဝင်တစ်ဦးဖြစ်ကြောင်း၊ လုယက်မှုများကျူးလွန်စဉ်က အသုံးပြုခဲ့သော သေနတ်များအား PDF အကြမ်းဖက်အဖွဲ့ဝင် ကိုစိုးကြီး(စိစစ်ဆဲ)ထံမှ ဝယ်ယူခဲ့ခြင်း ဖြစ်ကြောင်း၊ ၎င်းတို့ ၂ ဦးသည် မန္တလေးမြို့ ပေါ်ရှိ ရွှေဆိုင်များအား ဓားပြမှု၊ လုယက်မှုများ ကျူးလွန်၍ ရရှိငွေများဖြင့် လက်နက်၊ ခဲယမ်းများထပ်မံဝယ်ယူရန် မန္တလေးမြို့ ပေါ်သို့ တက်ရောက်လာခဲ့ကြခြင်းဖြစ်ကြောင်း၊ ထိုသို့ လုယက်မှုများကျူးလွန်ရာတွင် ခင်မင်ရင်းနှီးသူများဖြစ်ကြသည့်ပုသိမ်ကြီးမြို့နယ်နေ အောင်ပြည့်စုံလွင်နှင့် သန်းထိုက်ထွန်း(ခ)ငနဲတို့နှင့်ပူးပေါင်းကာ ကျူးလွန်ခဲ့ကြခြင်းဖြစ်ကြောင်း၊ဒီဇင်ဘာလ ၂၄ ရက်နေ့ ညနေ ၄ နာရီတွင် မဟာအောင်မြေမြို့နယ်၊ မဟာမြိုင်(၁)ရပ်ကွက်ရှိဆင်ဖြူတော်ငွေလွှဲလုပ်ငန်းအား ဝင်ရောက်လုယက်ရာတွင် မိုးအောင်(ခ)အောင်မိုးက MA 5 သေနတ်အား ကိုင်ဆောင်၍လည်းကောင်း၊ ကျော်စိုးလွင်(ခ)ကျော်ကြီး(ခ)ပြာတာမှ M4 A14 သေနတ်အားကိုင်ဆောင်၍လည်းကောင်း ဆိုင်အတွင်း ဝင်ရောက်လုယက်ခဲ့ကြခြင်းဖြစ်ပြီး အောင်ပြည့်စုံလွင်နှင့်သန်းထိုက်ထွန်း(ခ)ငနဲတို့နှစ်ဦးက ဆိုင်အပြင်မှနေ၍ အခြေအနေစောင့်ကြည့်ပေးခဲ့ကြခြင်းဖြစ်ကြောင်း၊ဒီဇင်ဘာလ ၂၆ ရက်နေ့ နံနက် ၈ နာရီ ၅၀ မိနစ်တွင် “နဂါးနန်းတော်” စိန်ရွှေရတနာ ဆိုင်အားလုယက်မှုကျူးလွန်ရာ၌ မိုးအောင်(ခ)အောင်မိုးမှ MA-5 သေနတ်ဖြင့်လည်းကောင်း၊ ကျော်စိုးလွင်၃(ခ)ကျော်ကြီး(ခ)ပြာတာမှ MA-4 A1 သေနတ်ဖြင့် လည်းကောင်း အသီးသီးကိုင်ဆောင်ကာ ဆိုင်အတွင်း ဝင်ရောက်၍ ဆိုင်ရှိဝန်ထမ်းများအား သေနတ်ပြခြိမ်းခြောက်ပြီး ဝင်ရောက်လုယက်ခဲ့ခြင်းဖြစ်ပြီး အောင်ပြည့်စုံလွင် က ဆိုင်အပြင်မှနေ၍ အခြေအနေစောင့်ကြည့်ပေးခဲ့ကြခြင်းဖြစ်ကြောင်းဖော်ထုတ်သိရှိရသည်ဟု သိရသည်။
ဖြစ်စဉ်တွင် “နဂါးနန်းတော်” စိန်ရွှေရတနာဆိုင်နှင့် ဆင်ဖြူတော်ငွေလွှဲလုပ်ငန်းတို့အားသေနတ်ပြခြိမ်းခြောက်၍ လုယက်မှုများကျူးလွန်ခဲ့သူ PDF အမည်ခံ အကြမ်းဖက်အဖွဲ့ဝင်များဖြစ်ကြသည့် မိုးအောင်(ခ)အောင်မိုး၊ ကျော်စိုးလွင်(ခ)ကျော်ကြီး(ခ)ပြာတာတို့နှစ်ဦးနှင့် ပူးပေါင်းကျူးလွန်သူ အောင်ပြည့်စုံလွင်၊ သန်းထိုက်ထွန်း(ခ)ငနဲ၊ ထွန်းမင်းလတ်(ခ)ထွန်းမင်းတို့ ၅ ဦးအားသက်သေခံ ရွှေထည်ပစ္စည်းနှင့် ငွေများ၊ လုယက်မှုကျူးလွန်ရာတွင် အသုံးပြုသည့် လက်နက်၊ခဲယမ်းများနှင့် အတူဖော်ထုတ်ဖမ်းဆီးရမိခဲ့ပြီး ဥပဒေနှင့်အညီ ထိရောက်စွာ အရေးယူနိုင်ရေးဆက်လက်ဆောင်ရွက်သွားမည်ဖြစ်ကြောင်း သတင်းထုတ်ပြန်ချက်အရ သိရသည်။
Telegram»…
https://t.me/positiveanglenews