(စီးပွားရေး) အောက်တိုဘာ ၁၀
ရန်ကုန်တိုင်းဒေသကြီးအတွင်း စားအုန်းဆီများကို အိမ်တိုင်ရာရောက် ဖြန့်ဖြူးရောင်းချမှုတွင် မှာယူသူများပြား နေသဖြင့် ယခုအောက်တိုဘာလတွင် အိမ်ထောင်စုပေါင်း ၁၈၀,၀၀၀ အထိတိုးချဲ့ဖြန့်ဖြူးရန် စီစဉ်နေကြောင်း ရန်ကုန်တိုင်းဒေသကြီး၊ စားအုန်းဆီအိမ်တိုင်ရာရောက် ဖြန့်ဖြူးရောင်းချရေးကော်မတီမှ သိရပါတယ်။
စားအုန်းဆီဖြန့်ဖြူးရောင်းချရာမှာ ပြည်သူများထံသို့ အိမ်တိုင်ရာရောက် Door to Door စနစ်နဲ့ ဩဂုတ်မှစတင်၍ ရောင်းချပေးခဲ့ရာ ယခုအောက်တိုဘာလအထိ ၃ လခန့်ရှိပြီဖြစ်ပါတယ်။
စတင်စမ်းသပ်ဆောင်ရွက်သည့် ဩဂုတ်လ အတွင်းမှာ ဆက်သွယ်ဝယ်ယူသူအိမ်ထောင်စု ၁၈,၀၀၀ ခန့်သာရှိခဲ့ပြီး စက်တင်ဘာလတွင် ထပ်မံ၍ Call Centre များ တိုးချဲ့စီစဉ်ဆောင်ရွက်ပေးခဲ့ရာ အိမ်ထောင်စု ၁၅၀,၀၀၀ ခန့်အထိ အမှာစာများတိုးမြှင့်ရရှိကာ ဖြန့်ဖြူးပေးပို့နိုင်ခဲ့ကြောင်း သိရပါတယ်။
လက်ရှိ ဆီမှာယူသူများအနေဖြင့်လည်း ပစ္စည်းရောက်ငွေချေစနစ်သာ ဖြစ်သည့်အတွက် ဆီဖိုးကိုကြိုတင်ငွေ ပေးချေရန် မလိုအပ်ကြောင်း၊ ပစ္စည်းမှာကြားသည့်ရက်နှင့် ပစ္စည်းရောက်ရှိမည့်ရက်မှာ ၅ ရက်ခန့် ကွာခြားနိုင်ကြောင်းနှင့် ပို့ဆောင်ပေးသည့် Delivery ခကိုတော့ မှာကြားသူဘက်မှ ပေးချေရမှာဖြစ်ကြောင်းလည်း အသိပေးထားရှိပြီး ဖြစ်ပါတယ်။
အိမ်တိုင်ရာရောက် ဖြန့်ဖြူးရောင်းချရေးကော်မတီမှ ထုတ်ပြန်ထားသောခရိုင် ၁၄ ခရိုင်ရှိ မြို့နယ် ၄၄ မြို့နယ်ရဲ့ ဆက်သွယ်မှာယူနိုင်တဲ့ Call Center ဖုန်းနံပါတ်များမှာ တိုက်ကြီး၊ လှည်းကူး၊ မှော်ဘီ၊ မင်္ဂလာဒုံ၊ အင်းစိန်၊ သန်လျင်၊ တွံတေးနှင့် မရမ်းကုန်းခရိုင်တို့အတွက် ၀၁-၄၇၀၅၅၆၆ (လိုင်းခွဲ- ၁၅ လိုင်း)နှင့် ၀၉-၉၄၀၁၇၁၂၂၂ (လိုင်းခွဲ-၁၅ လိုင်း) သို့လည်းကောင်း၊ ကျောက်တံတား၊ အလုံ၊ သင်္ဃန်းကျွန်း၊ ဗိုလ်တထောင်၊ ဒဂုံမြို့သစ်နှင့် ကမာရွတ်ခရိုင် တို့အတွက် ၀၉-၇၇၁၀၀၂၇၂၂ (လိုင်းခွဲ-၁၀ လိုင်း)နှင့် ၀၁-၄၇၀၆၇၂၂ (လိုင်းခွဲ-၁၀ လိုင်း)တို့ဖြစ်တယ်လို့ သိရပါတယ်။
#PAN