ဖေဖော်ဝါရီ ၂၉
မြန်မာ့ကြက်တောင်အားကစားမယ် သက်ထားသူဇာသည် Yonex German Open 2024 တွင် ပြင်သစ် ကြက်တောင်မယ် Léon ice Huet ကို ရှုံးနိမ့်သွားကြောင်း သိရပါတယ်။
အဆိုပါ ပြိုင်ပွဲကို ဂျာမနီနိုင်ငံတွင် ဖေဖော်ဝါရီလ (၂၇) ရက်မှ မတ်လ (၃) ရက်အထိ ကျင်းပနေကြောင်း သိရပါတယ်။
သက်ထားသူဇာသည် အဆိုပါ ပြိုင်ပွဲတွင် ကမ္ဘာ့အဆင့်သတ်မှတ်ချက်အရ (၃၂) ဉီးအဆင့်မှ ဝင်ရောက်ယှဉ်ပြိုင်ခွင့်ရခဲ့ပြီး ကမ္ဘာ့အဆင့် (၈၂) ရှိ ပြင်သစ် ကြက်တောင်မယ် Léon ice Huet နှင့် ဖေဖော်ဝါရီလ (၂၈) ရက်တွင် ယှဉ်ပြိုင်ကစားခဲ့ခြင်း ဖြစ်ပါတယ်။
ထိုသို့ ယှဉ်ပြိုင်ကစားရာ ပထမပွဲစဉ်တွင် ပြင်သစ်ကြက်တောင်မယ်က (၂၁) မှတ် (၁၅) မှတ်ဖြင့် အနိုင်ရရှိခဲ့ပြီး ဒုတိယပွဲစဉ်တွင် သက်ထားသူဇာက (၂၁) မှတ် (၁၈) ဖြင့် ပြန်လည်အနိုင်ရခဲ့သည့်အတွက် တတိယပွဲစဉ်ကစားရာ ပြင်သစ် ကြက်တောင်မယ် Léonice Huet က (၂၁) မှတ် (၁၇) မှတ်ဖြင့်အနိုင်ရကာ (၁၆) ဉီးရှုံးထွက်အဆင့်သို့ တက်ရောက်သွားခဲ့ပါတယ်။
ကမ္ဘာ့ကြက်တောင်အဖွဲ့ချုပ် လက်ရှိသတ်မှတ်ထားသည့် အမျိုးသမီးတစ်ဦးချင်းအဆင့်တွင် သက်ထားသူဇာ၏ လက်ရှိကမ္ဘာ့အဆင့်မှာ (၄၂) ဖြစ်ပြီး 2024 Paris Olympics ကိုဝင်နိုင်ရန်အတွက် လိုအပ်သည့် အမှတ်များစုဆောင်းနိုင်ရန် အကောင်းဆုံးကြိုးစားနေကြောင်း သိရပါတယ်။