ဒီဇင်ဘာ ၁၃
Rizespor အသင်းနဲ့ ကစားခဲ့တဲ့ Super Lig အိမ်ကွင်းပွဲစဉ်မှာ Ankaragucu အသင်းရဲ့ အသင်းပိုင်ရှင် Faruk Koca က ပွဲကြီးကြပ်တဲ့ ဒိုင်လူကြီးကို လက်သီးနဲ့ထိုးကာ နိုင်ငံရဲ့ လောလုံးလောကအတွက် ရှက်စရာဖြစ်ခဲ့ပြီးနောက် တူရကီဘောလုံးအဖွဲ့ချုပ် က လိဂ်အားလုံးက ပွဲစဉ်တွေကို ဆိုင်းငံ့ထားလိုက်ပါတယ်။
နှစ်ဘက် တစ်ဂိုးစီ သရေကျခဲ့တဲ့ ပွဲစဉ် ရဲ့ ပွဲချိန် ၉၇ မိနစ်မှာ ဧည့်သည်အသင်း Rizespor က ချေပဂိုးသွင်းယူခဲ့တာဖြစ်ပါတယ်။ ပွဲသိမ်းခရာ မှုတ်ပြီးနောက်မှာ အသင်းပိုင်ရှင်က ကွင်းထဲဝင်လာပြီး ဒိုင်လူကြီး Halil Umut Meler ကို လက်သီးနဲ့ထိုးခဲ့တာဖြစ်ပါတယ်။ လဲကျသွားတဲ့ ဒိုင်လူကြီးကို ဝိုင်းဝန်းကန်ကျောက်သူတွေလည်း ရှိခဲ့ပြီး နောက်ပိုင်းမှာ ဒိုင်လူကြီး မီလာကို ရဲအစောင့်အရှောက်နဲ့ အဝတ်လဲခန်းဆီ ပို့ဆောင်ခဲ့ရပါတယ်။
ဒီဖြစ်ရပ်က တူရကီဘောလုံးလောကအတွက် စိတ်ပျက်စရာဖြစ်ရပ်ပဲလို့ တူရကီဘောလုံးအဖွဲ့ချုပ်က ထုတ်ပြန်သွားခဲ့ပြီး ဒီဖြစ်ရပ်နဲ့ပတ်သက်လို့ လူနှစ်ယောက်ကို ဖမ်းဆီးထိန်းသိမ်း ထားတယ်လို့ နောက်ပိုင်းမှာ သတင်းထုတ်ပြန်ခဲ့ပါတယ်။
အသက် ၃၇ နှစ်အရွယ် ဒိုင်လူကြီးမီလာဟာ ဖီဖာ အသိအမှတ်ပြု ဒိုင်လူကြီးအဖြစ် ၂၀၁၇ ကတည်းက တာဝန်ယူခဲ့တာဖြစ်ပြီး နိုဝင်ဘာ ၂၈ ရက်နေ့က ကစားခဲ့တဲ့ လာဇီယိုနဲ့ ဆဲလ်တစ်အသင်းတို့ရဲ့ ချန်ပီယံလိဂ်အုပ်စုပွဲကို တာဝန်ယူထားခဲ့သူလည်း ဖြစ်ပါတယ်။