မန်ယူကစားသမား ဆန်ချိုကို ခေါ်ယူဖို့ ဂျူဗင်တပ်စ်အသင်း စီစဉ်နေ

အောက်တိုဘာ ၁၀
ဂျူဗင်တပ်စ်အသင်းက မန်ယူအသင်းမှ ထွက်ခွာရန် နီးစပ်နေသည့် တောင်ပံကစားသမား ဆန်ချိုကို လာမည့် ဇန်နဝါရီအပြောင်းအရွှေ့ကာလတွင် အငှားဖြင့် ခေါ်ယူရန် စီစဉ်နေကြောင်း သိရပါတယ်။
အသက်၂၃ရှိ ဆန်ချိုဟာ နည်းပြ တန်ဟက်ဂ်နှင့် ဆက်ဆံရေးအဆင်မပြေဖြစ်ခဲ့ပြီး ပြန်လည်တောင်းပန်ရန် ငြင်းဆန်ခဲ့သည့်အတွက် မန်ယူအသင်းမှ ထွက်ခွာရန် နီးစပ်လာခြင်းဖြစ်ပါတယ်။
တန်ဟက်ဂ်က ၎င်းကို အသင်းလူစာရင်းမှ ချန်လှပ်ထားခဲ့ခြင်းမှာ လေ့ကျင့်ရေးကွင်း၌ စွမ်းဆောင်ရည်ကောင်း မပြနိုင်သောကြောင့်ဖြစ်သည်ဟု ပြောကြားခဲ့သော်လည်း ၎င်းကမူ မိမိလေ့ကျင့်ရေးကွင်းတွင် ကောင်းကောင်းစွမ်းဆောင်နိုင်ကြောင်းနှင့် မည်သူ့မှတ်ချက်စကားကိုမျှ မယုံကြည်ကြရန် ပြန်လည်တုံ့ပြန်ခဲ့ပါတယ်။
ဆန်ချိုဟာ ၂၀၂၁ ခုနှစ်နွေရာသီတွင် ဒေါ့မွန်အသင်းမှ မန်ယူအသင်းသို့ ပြောင်းရွှေ့ကြေးပေါင်(၇၃)သန်းဖြင့် ပြောင်းရွှေ့ခဲ့သူဖြစ်ပြီး ယခု ပြဿနာဖြစ်ပွားချိန်တွင် အသင်းဟောင်းထံ ပြန်လည်ပြောင်းရွှေ့ရန် ဆန္ဒရှိနေကြောင်း သတင်းထွက်ပေါ်နေကြောင်း သိရပါတယ်။
ဂျူဗင်တပ်စ်အသင်းက ဆန်ချိုကို ဇန်နဝါရီအပြောင်းအရွှေ့ကာလတွင် အငှားစာချုပ်ဖြင့် ဦးစွာခေါ်ယူပြီး လာမည့် နွေရာသီ၌ ပေါင်သန်း(၆၀)ဖြင့် အပြီးသတ်ခေါ်ယူရန် စီစဉ်နေသည်ဟုလည်း သိရပါတယ်။